Verkefnið sem hér um ræðir snýst um að sauma Brennu- Njálssögu á hördúk sem mun verða um 90 metra langur. Saumað verður með völdu íslensku ullargarni sem er sérstaklega jurtalitað fyrir verkefnið. Um er að ræða refilsaum en refill er forn útsaumur sem stundaður var á Víkingaöld. Elstu reflarnir sem eru til á söfnum í heiminum eru um þúsund ára gamlir. Sá lengsti er í Bayeux í Normandí og er hann 70 metra langur.
Kristín Ragna Gunnarsdóttir, teiknari, listamaður og bókmenntafræðingur er hönnuður Njálurefilsins.
Samkvæmt Íslenskri orðabók frá 2002 er refill „lárétt veggtjald, langt og fremur mjótt, með útsaumuðum myndum (með refilsaumi)“
Áætlað var að vinna við gerð refilsins tæki allt að 10 ár en í desember 2017 er búið að sauma 68 metra (eftir 5 ár) þannig að reikna má með að verkið taki mun styttri tíma.
Refillinn er hýstur í Sögusetrinu á Hvolsvelli og þar fer saumaskapurinn fram. Vinnan við refilinn er öllum opinn og afraksturinn alltaf sýnilegur. Gjörningurinn er aðdráttarafl fyrir erlenda og innlenda ferðamenn ásamt áhugafólki um bæði íslendingasögurnar, listir og handavinnu.
Með refilsaumnum skapast nýtt tækifæri í afþreyingu á svæðinu þar sem gestir og gangandi geta komið og tekið þátt í að sauma myndirnar. Gestir greiða fyrir þátttöku og skrá sig og sitt framlag í þar til gerða bók. Þeir sem ekki vilja sauma sjálfir geta orðið þátttakendur með því að kaupa mynd sem starfsmaður saumar fyrir hann og viðkomandi fær nafn sitt í bókina.
Með gerð refilsins verður Njála sýnd með nýjum hætti.
Tilgangur verkefnisins er fyrst og fremst að skapa magnað verk sem hefur mikla þýðingu í ferðaþjónustu og í samfélagi heimamanna. Öll vinnan við refilinn er samvinna fyrirtækja stofnanna og áhugasamra aðila hér á Suðurlandi. Sögusvið Njáls sögu nær yfir Suðurland og tengir því svæðin allt frá Hornafirði í austri að Þingvöllum í vestri.
Njála er þekktasta fornsagan sem við Íslendingar eigum og mjög margir erlendir ferðamenn og fræðimenn gera ferð til landsins til að skoða sögusvið sögunnar sem er ljóslifandi allt í kringum okkur á Suðurlandi.
Njálurefill, Sögusetrinu Hvolsvelli
Hlíðarvegi 14
860 Hvolsvöllur
This email address is being protected from spambots. You need JavaScript enabled to view it.
Fjallasaum ehf
Hlíðarvegur 15
860 Hvolsvöllur